ГехIел тугъла назмурти

Азиралра биркIайзи
Катурли мурхьли мякьи,
Минадиуб манзиллис
Набчи декIти децI-анцIкьи. 

ХIуша дяхIяэс хIейрар
Сабурла вегIли ахIи,
АнцIкьи-децIлис дарманра
Агара, далай ахIи.

***

Давлаагар виасра,
АхIенра дагьриагар;
Юрт агарси виасра,
АхIенра умутагар. 

ХIуни эс вируд набзи:
“Хъа бухIнаб селра агар”,
Гьалаб я къакъла гIелаб
Эс хIейруд: “инсапагар”.

***

ГIе, нунира вираси
Зурба кIялгIя тIашбатес,
Тухум музабухъалри,
Кумекла някъ гьабатес. 

Тухумти, гьигь лебалли,
ВикIус хIушаб баркалла,
Диадалли наб дугIли
ХIебиахъули бунагь.

***

ХIед гIямрура жанраван
Дигахъадли бузери,
ХIу гIямрура жанраван
Халкьлисра дигахъури.

ТалихI сархнигъуна саб
Халкьла хIурмат сархнира,
Гьунар барнигъуна саб
Халкьла амру бихнира.

***

ГIяхIси гIямал гIебаса
Вайси гIямал убаса,
УркIи агармайруда,
БацIли саб или киса. 

Буркьа пикри гьабяхъя,
Бархьдешличи къакъбяхъя,
Сабурличил узули,
Сагъси гъабза сай ахъа.

***

Усал гъабза усалли
Кавлуси сай мурталра,
Гъабзачил гьалмагъикес
Вамсайчи къунзикIалра.

Мунапикьра мурталра
Кавлан левси тяхIярли
Нартличил варх гьархIели
Вашаллира архIяли.

***

Чакарагар чяй хIейги
Гимиагар чанг хIейги,
Чарх чагъбиру бикIалра,
Я чягъирла кеп хIейги.

МягIниагар мез хIейги
Я мялгIун мезлукь хIейги,
Мургьили тувикIалра,
Мякьлав мунапикь хIейги.

***

ХIулбала нур дишунти,
ДяхIлаб берхIи ахъибти,
Держла шишначи чули
Дигай- карцIай хIехъибти.

Муйли баласра бахъал
Мекъла хъулри дехъубти,
ХIебиаллира лебил
ГIякьлузибад бухъунти.

***

Вирукъира хIериэс
Адамтиван духули,
Нура калунра вахъхIи
Держла амру бихули.

Тамай кьутIкьувиайчи
Ралликьянас гIямрула,
Магьар кабушес бикиб
Шишаличил гIяркьила.

***

ВегIлара хIярамсира
Ну хIярамсира хIейкIар,
ВегIла хъярхъси хъямчира
Няс хъямчи сайра хIейкIар. 

КIазван кIантIил кIарзара
Ну кIарза сайра хIейкIар,
Бура чутхIера викIес
Вирару чутхIе сайра?

***

Халал хазнала вегI сай —
ХIед бикIули бакьира,
Халал хIурматла вегI сай —
БикIули хIебакьира.

Давлачевси сай или
ХIед бикIули бакьира,
Ламус-адаб лерси сай
БикIули хIебакьира.

***

ХIегъти дибягъунани
ДукелцIичи вихьайчи,
ДурхIнас узи-уршилис
Уркъубяхъ ветаайчи,

Ламартли лардяхъяйчи,
Мусибат лагбяхъяйчи,
ХIябра гIяхIси бетаур
Держла къянкъуби дячни.

***

КарцIхIейубсили багьес
ХIейрар карцIайла цIакьдеш,
Къячикунсили цIакьли
Бала цIала буцIардеш. 

Бужантас гIякьлу бурес
Дураухъи ахIенра,
УжухIеливан ахIи,
ХIевжухIели гIяхIилра.

***

ХIуни хатир бирули,
Сунени хIебиралли,
Вати сунела мерлав
Ил няс някъ гьакIбарили.

ХIуни хIурмат барили,
Сунени хIебиралли,
Адам хIейъни багьурли
Уэн ил хъумартурли.

***

Духуси виаслири,
УрхIван, нура жагьхIели,
ТIулбачи кьацIхIейкIаси
Гьанна хIяниубхIели.

Мурхьли пикриухъунси
Виаслири итхIели,
Ну вегIси юрт агарли
ХIерхIейраси ишхIели.

***

Гьамаддешличи вари
Бурсимайруд хIу, урши,
Гьамаддешли чилалра
ХIедухъахъуну арши.

Бузери байрахъбарли,
Къатавти авдахъули
ГIямру дуркIуси чейу
ГIялам халкьли дурхъали.

***

Гьаман держли бужанти,
Бержес гьанни руржанти,
Гьалмагъуни бетхIерар
Саби-ургаб уржибти.

Бержили кепли къагъти,
Держличи кIапIбашути
БирхIебирар къугъати—
Бирар лебгIеб дибягъти.

***

Урези агарсила
УркIецIира хIедирар,
Угърашла уркIилизиб
Умуси яхI хIебирар.

Дибягъла далуйтала
Дуб-дазу дирхIедирар,
БекIбяхъла хабуртира
Берк –бержличила дирар.

***

Нешлис бяхъибси бекIбяхъ
Изай уцаб вабаъла,
Инсапагарличи бахъ
Лайикьсину луала.

Дудешлис ахъбуцибси
Някъ чеббикаб хIяжарла,
Ламус – хIяя дицибси
ХIярхIяли вяхъ мажарла

***

Баркьахъили биштIати
Бархьбатурли дубшанти,
Адабла ва хIяяла
ЯхIлара цIа дишунти.

КьапIни дихулихьалли
Багьа камти бургала,
Агарти диадалри
Дубуртазир даргала.

Замана