ГлавнаяРегистрацияВход путь дарго
Джан дерхъав!

Воскресенье, 17.02.2019, 14:33
  Мой Дагестан Приветствую Вас гость | RSS

 
 
Главная » Статьи » Литература

КЪАРКЪАЛА ДУРХIЯ
(Халкьла далай)

ЦIудара гъагултани
Зак саби кIапIбарили.
Музурби ва къадурти
ПухIдухъи сари гавли.

ИшбархIи валкIа Тимур
Сай шадли шадлихълизив,
Дубурти угьдикIули
ГIязабтазир, децIлизир.

Шараб шинна гIинзурби
Сари хIили дицIили,
Нешанала нургъби сар
Шинничирра дургIели.

Илгъуна кьисматличи
Кьабулкайкес вирусив?
Дагъиста халкьанани
Иличи гьандурцусив?

БекIличибси кьапаван
Дунъя саб ласбикIуси,
Вати, гьанна виахъес
Тимур тахличив ахъси.

Аммаки ил каркуси
БархIи саб гъамбикIули,
ИшбархIи Дагъистайзиб
Саби ил бехIбирхьули.

Гьанна дубурла шими
МицIир дацIли диалра,
ВалкIа Тимурла гIяскар
Музурбачиб биалра,

Юх, агара вацIурби
Душман дигIянвикести,
Агара гIинзурбира
Душман шинни ужести.

Гавлизиб саби дунъя
Чебиуси агара,
ЦIализир сар дубурти
МехIе руркъули бекIла.

Шинна кIантI мургьиличиб
Саб верхIнали дурхъали,
Хъямчибала жан сари
Гавличирра дургIели.

Тимур викIар: «Даргая
ГIинзурби дубуртазир,
ХIуребалис шин хая
Валрумачир тIавгьназир!..»

Тимурла бургъанти саб
Милигли, цIумбикIули.
Шин агара! Валруми
Чардухъун мицIир дацIли.

Руржули кьукьмуцикиб
Вазир Тимурла гьала:
«УркIецIи бара, вегIбекI,
Чилра варгхIеваргира!

ЧIянкIли ит шурла удив
Абдал хъяша варгира,
"Ишаб гIиниз чинаба?"
Сунези хьарбаира.

Жаваб хIегиб, хIеризур
Дахъ гьимити хIулбачил.
Даргъкайзур, ахъбуцили
БекIра уктемдешличил»

«Эй, вазир, хъумартуррив,
ВикIар Тимур гIясили,
Абдал бекI бугал турли
Бирар духубирули.

Шин агара! УркIецIи
Дигулри хIед набзибад...
Сен гъай ахIебитIунрив
ХIуни хъяшализибад?»

«О, вегIбекI, тиладину
ЛехIизигу нушачи,
Се гъайли гъайдикIирал
Нуша ил уршиличил!

ГIярчумагли ил тугъар
Варира дамсарачи,
Баягъи сунна хъяйхъи
Ил бячунра бекIличиб.

Амма дугIли. Кайкиб ил
БекI гьеч гIяшхIебарили,
Къагъиуб, шинничила
Нушази дубхIехъили!»

«Эй, вазир, хъумкартуррив,
Иб Тимурли алзули,
Абдал бекI бугал турли
Бирар духубирули.

Эй, мехIур, дигадлири
Уршила кьяшми цIали,
Шин чинар чухдикIулил
Хъярхъли гьанбикахъесли!»

«УркIецIи бара, вегIбекI!
Нуша ил уршиличил
ГъайдикIира хIунтIенни
ЛагьбикIуси мегьличил.

Амма дурахIебушиб
Гьеч тIама ца цIумлалра.
Белики, мургьи-арцли
Гъайахъес хIезиалра?»

Кахси Тимурла гьалав
Урши даргъкайзурлири,
ХIулилра липIхIебалли,
БекI ахъли кабуцилри.

ВикIар ил: Наб патишагь,
Мургьи ахIен гIягIнили.
Уршили душманнис неш
РирцхIерирцу мургьилис!

УркIилаб яхI лебсини
ВатIайс усалдеш хIейру.
Сунна халкьлис ламартдеш
Вайгъабзалицун диру!»

Уршила цIудар хIулби
Уктемли хIердикIулри
ХIулби айтIахъес някъли
Лишан бариб Тимурли.

Уршили дурути гъай
Къукъуван зайдикIулри
Лезми дурабитIахъес
Буйрухъбариб Тимурли.

ГIинзурбала шин ахIен
ХIи сари чяхIдикIули,
Ванза хIилирурхьули
Урши сай жиикIули:

«ГIяшдирая хIуша,
Дирихьми ва гъагулти,
Дагъиста къадурбазиб
ЧеббалкIахъес душманти!

Шанданван чIумадиаб
Дубуртала лусенти,
Дагъистайзибад бебшес
ХIебиэсли душманти!

Ветаас ну къярдлизив
ЦIубхIярила шурили,
Душмантас гьуни гIекIес
Бебшес балбизурхIели!»

УркIилаб кьас биалли
БуцIарси цIаличибра,
Сеннира ил бетурхар
Гьалакли лямцIличибра.

БукIун урши ветаур
Къярдла дайлав шурили.
Ил шури бусягIятра
Саби нушачиб тIашли!

Я ил шури гъятIаэс
БиркхIебиркур душманнис.
Дикалра чум азир дус,
ТIашли бирар даимлис!

ХIу айкьур хIела ВатIан
ХIед ахIерли биалли,
Дергълизиб убкIухIели,
Ветаи хIу шурили!
Категория: Литература | Добавил: дарго_магомед (05.02.2019)
Просмотров: 16 | Рейтинг: 0.0/0
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]
 
 
Форма входа


Категории раздела
Адаты [27]
Властные структуры [10]
Города и села [34]
Даргинский язык [34]
Имена Дарго [76]
Ислам [34]
История и география [92]
Кухня [14]
Литература [51]
Население [9]
Научно-популярное [91]

Поиск

Наш опрос
Ваше мировоззрение
1. Мусульманин
2. Христианин
3. Я даргинец!
4. Агностик
5. Атеист
6. Иудей
7. Буддист
8. прочее
Всего ответов: 200

Статистика


Онлайн всего: 1
Гостей: 1
Пользователей: 0
 

 

Copyright MyCorp © 2019
Сайт создан в системе uCoz