ГлавнаяРегистрацияВход путь дарго
Джан дерхъав!

Четверг, 17.01.2019, 18:35
  Мой Дагестан Приветствую Вас гость | RSS

 
 
Главная » Статьи » Литература

СУЛТIАНГIЯХIМАД ИШТIАГАН
(Бурала)

Ца нешла хIябал дурхIя
ГIяярли дурабухъун
Ахъил шурла лесличи,
Лачинна дурхIни касес.
Ахъил шурла лесличи
Абаили тIашбизур,
ХIу кавхъен ца бикIули,
ХIу кавхъен ца бикIули,
Илдала дяв кабикиб.
ЧIалабуршес бехIбихьиб.
Узби дила халати,
Мадуршидая чIала.
Сасили тIанилла дуб,
Алавварили вайла,
Ватихьиб шурла лесла
СултIангIяхIмад иштIаган.

Узби дила халати,
Лачинна пукьализир
Сари къянала дурхIни,
Лаг дитIакIая тIанил.

Лаг дитIикIехIе тIанил,
СултIангIяхIмад иштIаган,
Хъарахъ дицIиб цIуб маза
Датадли нушаб хIялал.

ХIялалдиаб хIушаб,
Узби дила халати,
Лаг дитIикIая тIанил.

Лаг дитIикIехIе тIанил,
СултIангIяхIмад иштIаган,
Абала хъулибил мас
Батадли нушаб хIялал,
ХIейубли хIу бутIала.

ХIушабал хIялал биаб,
Узби дила халати,
Лаг дитIикIая тIанил!

Лаг дитIикIехIе тIанил,
СултIангIяхIмад иштIаган,
Някъличир къарчигъаван
АхIерли хIеррарибил,
Тевлейлерил тазиван
Хамли халараибил
УркIилис кьабул гьалмагъ
Ратадли хIуни хIялал.

Валлагь, Аллагьличира
Сецад гьимдукIадалра,
ХIералтас хIушаб хIялал!
Кьурбан къачала диъван
Варили бутIа-бутIа
Хъали-хъайгIи уртIасра,
ХIералтас гьалмагъ хIялал

ХIушагъунти вайгъубзнас!..
Яни диркьул дяхIиван
Виркьусилра виасри
Гъарибла дила нешли,
ХIебири ишцад декIли.
АтхIебла вана манзил
Хъар дубрир гулвавниван
Лявкьусилра виасри,
АхIерхIейраси бекIли.

Ватурли СултIангIяхIмад
Ахъил шурла леслизив,
Чарбиуб кIелра узи,
Далайра или сабра.
Шилизи бетиуйхIиб
ДяхI-дяхIли къаршибикиб
ХIябалрала рузира
ИштIага гелешмешра.

Вай узби, дила кIелра,
Сейуба СултIангIяхIмад?

Сейэса СултIангIяхIмад,
Ахъил шурла леслизив,
Лачинна пукьализив
Мукьараван умхIули
Кес хIедиубли калун.

Чарриубли рузини
Чакарли хунжи дуцIиб,
Сунна кьабул гьалмагъли
Шарабли шишини дицIиб,
Бетаиб ахъ шурличи.

СултIангIяхIмад, рузи ребкI,
ХIу чинаври, хIу сери?
ХIела кIелра узичил
ХъайгIи сен вакIхIекIири?

ХъайгIи сен-сен вакIиша,
Уббухъунгу ламартла
КIелра халати узи.

Шантас вявдеш дирехIе,
Сабурбара, тIашизи,
КьацIлис гушлирив или,
Чакарли дицIиб хунжи
Сунна дардла рузини
ГьакIдарили даткаиб,
Хъям-хъямикIун ухIейкиб,
Сунна кьабул гьалмагъли
Шарабли дицIиб шинни
ГьакIдарили датаиб,
Хъям-хъямикIун ухIейкиб...

Гьанна пайда агара,
ДурхIя хIеркьира или,
Нешра паргъаткариаб,
Узи угаги или,
ХIура хъули чаррухъен;
УркIилис кьабул гьалмагъ,
Гьалмагъ агара или,
Гьалмагъличи ласрухъен...

ГьалавяхI гьуцIухъалли,
Саби ханихла къада.
ГIелавяхI гьакIиалли,
Саби къаркъала шури.

ГьакIухъун СултIангIяхIмад,
Мурхьил къадала кайкиб,
Лигби ца мерла чегиб,
ХIи ца шайчи чярхIдухъун
Язикъ СултIангIяхIмадла.
Шурлис алавбиубли
Сунна кьабул гьалмагъра
Сунна гъариб рузира,
Шарабли дирцIу шишни
Сунела хIили дицIиб,
Чакарли дирцIу хунжи
ЦIуба лигбани дицIиб,
ХъулибяхIли батбихъиб,
ВацIала хьанцI буцIиван
Саби авкабикIули,
Дай дугила замана
Саби кIелра сабаиб.
Масли буртIули баргиб
СултангIяхIмадла узби.

БутIа камил мусани
ХIерая, ихди лигби.
Хазна камси мерличи,
ХIерая, кертIая хIи!...
Жявли вебкI вайна гъабза,
Виалра даргла узи,
Къиян дакIиб мерличив
Увулхъанну ламартла.


Источник
 
Категория: Литература | Добавил: дарго (08.01.2019)
Просмотров: 10 | Рейтинг: 0.0/0
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]
 
 
Форма входа


Категории раздела
Адаты [27]
Властные структуры [10]
Города и села [33]
Даргинский язык [34]
Имена Дарго [76]
Ислам [34]
История и география [92]
Кухня [14]
Литература [50]
Население [9]
Научно-популярное [91]

Поиск

Наш опрос
Ваше мировоззрение
1. Мусульманин
2. Христианин
3. Я даргинец!
4. Агностик
5. Атеист
6. Иудей
7. Буддист
8. прочее
Всего ответов: 199

Статистика


Онлайн всего: 2
Гостей: 2
Пользователей: 0
 

 

Copyright MyCorp © 2019
Сайт создан в системе uCoz